Ορφικοί ύμνοι/Τριετηρικού

Ὀρφικοὶ ὕμνοι Τριετηρικοῦ, θυμίαμα ἀρώματα

Κικλήσκω σε, μάκαρ, πολυώνυμε, μανικέ, Βακχεῦ,
ταυρόκερως, ληναῖε, πυρίσπορε, Νύσιε, λυσεῦ,
μηροτρεφής, λικνῖτα, πυριπόλε καὶ τελετάρχα,
νυκτέρι’, Εὐβουλεῦ, μιτρηφόρε, θυρσοτινάκτα,
ὄργιον ἄρρητον, τριφυές, κρύφιον Διὸς ἔρνος, 5
πρωτόγον’, ἠρικεπαῖε, θεῶν πάτερ ἠδὲ καὶ υἱέ,
ὠμάδιε, σκηπτοῦχε, χοροιμανές, ἁγέτα κώμων,
βακχεύων ἁγίας τριετηρίδας ἀμφὶ τιθήνας,
ῥηξίχθον, πυριφεγγές, ἐπάφριε, κοῦρε διμῆτωρ,
οὐρεσίφοιτος, Ἔρως, νεβριδοστόλος, ἀμφιέτηρε, 10
Παιὰν θυρσεγχής, ὑποκόλπιε, βοτρυόκοσμε,
Βάσσαρε, κισσοχαρής, πολυπάρθενε κύδμε κοῦρε·
ἐλθέ, μάκαρ, μύστῃσι βρύων κεχαρημένος αἰεί.