Τέχνη γραμματική/ΙΘ'

← Προηγούμενο

Περιεχόμενα

Επόμενο →

ἐπίῤῥημά ἐστι μέρος λόγου ἄκλιτον, κατὰ ῥήματος λεγόμενον ἢ ἐπιλεγόμενον ῥήματι.

τῶν δὲ ἐπιῤῥημάτων τὰ μέν ἐστιν ἁπλᾶ, τὰ δὲ σύνθετα· ἁπλᾶ μὲν ὡς πάλαι, σύνθετα δὲ ὡς πρόπαλαι.

(α´)

τὰ δὲ χρόνου δηλωτικά, οἷον νῦν τότε αὖθις· τούτοις δὲ ὡς εἴδη ὑποτακτέον τὰ καιροῦ παραστατικά, οἷον σήμερον αὔριον τόφρα τέως πηνίκα.

(β´)

τὰ δὲ μεσότητος, οἷον καλῶς σοφῶς.

(γ´)

τὰ δὲ ποιότητος, οἷον πύξ λάξ βοτρυδόν (Β 89) ἀγεληδόν (Π 160).

(δ´)

τὰ δὲ ποσότητος, οἷον πολλάκις ὀλιγάκις.

(ε´)

τὰ δὲ ἀριθμοῦ δηλωτικά, οἷον δίς τρίς τετράκις.

(ϛ´)

τὰ δὲ τοπικά, οἷον ἄνω κάτω· ὧν σχέσεις εἰσὶ τρεῖς, ἡ ἐν τόπῳ, ἡ εἰς τόπον, ἡ ἐκ τόπου, οἷον οἴκοι οἴκαδε οἴκοθεν.

(ζ´)

τὰ δὲ εὐχῆς σημαντικά, οἷον εἴθε αἴθε ἄβαλε.

(η´)

τὰ δὲ σχετλιαστικά, οἷον παπαῖ ἰού φεῦ.

(θ´)

τὰ δὲ ἀρνήσεως ἢ ἀποφάσεως, οἷον οὔ οὐχί οὐδῆτα οὐδαμῶς.

(ι´)

τὰ δὲ συγκαταθέσεως, οἷον ναί ναίχι.

(ια´)

τὰ δὲ ἀπαγορεύσεως, οἷον μή μηδῆτα μηδαμῶς.

(ιβ´)

τὰ δὲ παραβολῆς ἢ ὁμοιώσεως, οἷον ὡς ὥσπερ ἠΰτε καθάπερ.

(ιγ´)

τὰ δὲ θαυμαστικά, οἷον βαβαῖ.

(ιδ´)

τὰ δὲ εἰκασμοῦ, οἷον ἴσως τάχα τυχόν.

(ιε´)

τὰ δὲ τάξεως, οἷον ἑξῆς ἐφεξῆς χωρίς.

(ιϛ´)

τὰ δὲ ἀθροίσεως, οἷον ἄρδην ἅμα ἤλιθα.

(ιζ´)

τὰ δὲ παρακελεύσεως, οἷον εἶα ἄγε φέρε.

(ιη´)

τὰ δὲ συγκρίσεως, οἷον μᾶλλον ἧττον.

(ιθ´)

τὰ δὲ ἐρωτήσεως, οἷον πόθεν πηνίκα πῶς.

(κ´)

τὰ δὲ ἐπιτάσεως, οἷον λίαν σφόδρα πάνυ ἄγαν μάλιστα.

(κα´)

τὰ δὲ συλλήψεως, οἷον ἅμα ὁμοῦ ἄμυδις.

(κβ´)

τὰ δὲ ἀπωμοτικά, οἷον μά.

(κγ´)

τὰ δὲ κατωμοτικά, οἷον νή.

(κδ´)

τὰ δὲ βεβαιώσεως, οἷον δηλαδή.

(κε´)

τὰ δὲ θετικά, οἷον γαμητέον πλευστέον.

(κϛ´)

τὰ δὲ θειασμοῦ, οἷον εὐοἵ εὔἁν.